អាជ្ញាធរខេត្តកំពង់ចាម និងខេត្តព្រៃវែង ចាប់ផ្ដើមបូមទឹកពីស្ថានីយ៍បូមទឹកទន្លេវ៉ៃកូ សង្គ្រោះស្រូវប្រាំងជិត១ម៉ឺនហិកតា ក្នុងខេត្តព្រៃវែង

ឯកឧត្តម អ៊ុន ចាន់ដា និងអភិបាលខេត្តព្រៃវែង នៅព្រឹកថ្ងៃទី ១ ខែគុម្ភៈ ឆ្នាំ ២០២៤ ចុះពិនិត្យស្ថានីយបងទឹកទន្លេវ៉ៃកូ ស្ថិតក្នុង ឃុំមហាលាភ ស្រុកកោះសូទិន ខេត្តកំពង់ចាម ។

អភិបាលខេត្ត បានបញ្ជាក់ទៀតថា បច្ចុប្បន្ននេះ ដោយសារខេត្តព្រៃវែង មាន ៣ស្រុក ១៣ឃុំ ត្រូវការទឹក ដើម្បីសង្គ្រោះស្រូវប្រាំង របស់ប្រជាកសិករ ដែលមានទីតាំងជាប់ដងស្ថានីយ៍ទន្លេវ៉ៃកូ ប្រមាណជាជិត ១ម៉ឺន ហិកតា។ បន្ទាប់ពីអាជ្ញាធរខេត្តទាំងពីរ បានចុះពិនិត្យ ទើបឯកភាពគ្នា សម្រេច បូមទឹកពីទន្លេតូច តាមរយៈស្ថានីយ៍បូមទឹកទន្លេវ៉ៃកូ ដើម្បីផ្គត់ផ្គង់ទៅ ខាងខេត្តព្រៃវែង ដែលត្រូវការទឹកប្រមាណជា ២០ លានម៉ែត្រគីប និងត្រូវការរយៈពេលបូមទឹក ១៦ថ្ងៃ ពីព្រោះប្រព័ន្ធធារាសាស្ត្រនេះ អាចប្រើរយៈពេល ៣ថ្ងៃ ទើបទឹកហូរដល់ ស្រុកមេសាង ខេត្តព្រៃវែង។

អភិបាលខេត្តកំពង់ចាម បញ្ជាក់ ថា ដំណើរការបូមទឹក នឹងត្រូវចាប់ផ្ដើមថ្ងៃទី ១ ខែគុម្ភៈនេះតែម្ដង ដែលការចំណាយលើការបូមទឹកនេះ ជាបន្ទុករបស់រដ្ឋបាលខេត្តកំពង់ចាម ៕