សមត្ថកិច្ចឃាត់ខ្លួន តារាចម្រៀង ប៊ុត សីហា ពាក់ព័ន្ធគ្រឿងញៀន
កំពង់ស្ពឺ ៖ តារាចម្រៀង ប៊ុត សីហា ត្រូវបានកម្លាំងសមត្ថកិច្ចស្រុកគងពិសីបង្ក្រាបចាប់ឃាត់ខ្លួន រួមជាមួយគ្រឿងញៀនមួយចំនួន ។
ការឃាត់ខ្លួនបានប្រព្រឹត្តទៅកាលពីវេលាម៉ោង៤និង១០នាទីរសៀល ថ្ងៃទី១២ ខែកញ្ញា ឆ្នាំ២០២៣ នៅក្នុងភូមិត្រាំខ្នា ឃុំស្នំក្រពើ ស្រុកគងពិសី ខេត្តកំពង់ស្ពឺ ។
ជនសង្ស័យមាន ២ នាក់ ៖ ទី១ ឈ្មោះ ប៊ុត សីហា ភេទប្រុស អាយុ២៩ឆ្នាំ ជាតារាចម្រៀង រស់នៅភូមិព្រះម្លប់ ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ ។ ទី២ ឈ្មោះ ឆន វល្លិន ភេទប្រុស អាយុ៣៨ឆ្នាំ មុខរបរមិនពិតប្រាកដ រស់នៅភូមិត្រាំខ្នា ឃុំស្នំក្រពើ ស្រុកគងពិសី ខេត្តកំពង់ស្ពឺ ។ ក្នុងប្រតិបត្តិការខាងលើ សមត្ថកិច្ចដកហូតបានថ្នាំញៀនចំនួន៥កញ្ចប់ ។
តាមសមត្ថកិច្ចបានឲ្យដឹងថា បន្ទាប់ពីទទួលបានព័ត៌មានជុំវិញសភាពការក្នុងមូលដ្ឋាន កម្លាំងសមត្ថកិច្ចចុះទៅបង្ក្រាបឃាត់ខ្លួនបានជនសង្ស័យ២នាក់ រួមជាមួយវត្ថុតាង រួចបញ្ជូនទៅការិយាល័យជំនាញ ដើម្បីកសាងសំណុំរឿងតាមនីតិវិធី ។
យ៉ាងណាមិញ នេះជាលើកទី២ ហើយដែលតារាចម្រៀង ប៊ុត សីហា ត្រូវបានមត្ថកិច្ចឃាត់ខ្លួនរឿងគ្រឿងញៀន ដែលលើកទី ១ នោះនៅឆ្នាំ ២០១៨ លោកត្រូវបានឃាត់ខ្លួននៅមុខសាលាបឋមសិក្សាពងទឹក សង្កាត់ពងទឹក ខណ្ឌដង្កោ រាជធានីភ្នំពេញ ដែលពេលនោះរូបលោកទៅទិញគ្រឿងញៀនដើម្បីជក់ ប៉ុន្តែត្រូវបានអាណាព្យាបាល និងក្រុមគ្រួសារ ចូលខ្លួនមកធានាយកទៅធ្វើការអប់រំ និងដាក់នៅកន្លែងបន្សាបគ្រឿងញៀន។ ករណីនេះបានធ្វើឱ្យ ប៊ុត សីហា ស្អុយឈ្មោះក្នុងចង្កោមសិល្បៈ និងសាបរលាបឈ្មោះជាម្ចាស់ពាន The Voice Cambodia រដូវកាលទី ១ ក្រោយលោកលើកពានបាន ៣ ឆ្នាំ៕
Post a Comment